۱۔      آج یوم شہداء کی دوسری تقریب کے موقع پر شکرگزاری اور اطمینان کے احساس کے ساتھ آپ سے مخاطب ہو رہا ہوں۔ پچھلے برس یوم شہداء کا آغاز اس تصور کے ساتھ کیا گیا تھا کی ہم وطنِ عزیز کی سرفرازی ، استحکام اور سلامتی کے لئے پاک فوج کے ان جاں بازوں اور جان نثاروں کی خدمات کا اعتراف کر سکیں ، جنہوں نے اپنے خون سے قومی تاریخ کا ایک روشن باب رقم کیا اور ساتھ ہی شہداء کے اہل خانہ کو یقین دلا سکیں کہ ہم زندگی کے ہر قدم پر، مشکل کے ہر مرحلے میں ان کے ساتھ ہیں اور انشاء اﷲ ساتھ رہیں گے۔

۲۔      خدا کاشکر ہے کہ ہم کوئی شہادت بھولے نہیں ہیں۔ پاکستانی عوام بھی اپنے شہیدوں کی قربانیوں سے پوری طرح آگاہ ہیں۔ وہ جانتے ہیں کہ قیام پاکستان سے اب تک ہماری مسلح افواج نے آزمائش کی ہر گھڑی میں اپنی ذمہ داریوں کو پورا کیا ہے۔ سرحدوں کی حفاظت کا مرحلہ ہو، سیلاب اور زلزلے کی تباہ کاریوں کے بعد بحالی کا مرحلہ ہو یا دہشت گردوں سے وطن کی امن و سلامتی کو درپیش خطروں سے نبٹنے کا مرحلہ، پاکستانی فوج نے قربانی دینے سے کبھی گریز نہیں کیا۔

۳۔      ہمارے ہیروزکی زندگیاں اور کارنامے آج بھی ہمارے لئے عظیم سرمایہ ہیں ۔ہمیں فخر ہے کہ ہم اس اثاثے کے امین ہیں جو شہیدوں کی لازوال داستانوں سے ترتیب پاتا ہے۔ پاکستان ایک نظریاتی اسلامی مملکت ہے جن کی بنیادیں لاکھوں شہیدوں کے لہو پر استوار ہیں۔ ہمار ے شہداء نے ایک نصب العین کے لئے اپنی جانیں قربان کیں اور حیات ابدی سے سرفراز ہوئے۔ ان کی شہادت ایک عظیم نصب العین سے ہمارا رشتہ اور تعلق لافانی بناتی ہے۔ یہی وجہ ہے کہ آج بھی ہماری مسلح افواج کاہر جواں ، وطن کے لئے ، اپنی جان ہتھیلی پر رکھ کر ، ہر محاذ پر مسلسل دادِ شجاعت دیتا چلا آ رہا ہے۔

خواتین و حضرات!

۴۔      ہمیں ایک لمحےکےلیے بھی نہیں بھولنا چاہیے کہ پاکستان کے عوام اور فوج ایک اکائی ہیں۔ ہمار ی قومی طاقت ۔۔۔ اتحاد، باہمی اعتماد اور استقلال ہے۔ دہشت پسندی کے خلاف حالیہ جنگ میں پاکستان کے عوام نے افواج پاکستان کے شانہ بشانہ جان و مال کی بے مثال قربانیاں دی ہیں۔ استحکامِ پاکستان کے عمل میں پوری قوم کا افواجِ پاکستان کے ساتھ تعاون اس ناقابلِ تسخیر اتحاد کا مظہر ہے۔ یہی اتحاد پاکستان کو صحیح معنوں میں مضبوط بنا سکتا ہے۔ اس حقیقت میں شک کی کوئی گنجائش نہیں۔

۵۔      آج ہم پاکستان کی تاریخ کے ایک مشکل دور سے گذر رہے ہیں ہمیں مشکلات کا سامنا ہے۔ تاریخ شاہد ہے کہ قوموں پر مشکل وقت آتے رہتے ہیں ۔ زندہ اور آزاد قومیں اسے چیلنج سمجھ کر قبول کرتی ہیں۔ جو قوم ان سے سرخرو ہو کر نکلے وہ اپنے اندر ایک نیا اعتماد پاتی ہے اور ترقی کی راہوں پر گامزن ہوتی ہے۔

۶۔      آج ہم سب کا فرض ہے کہ ہم ان حالات کو سمجھیں ، اپنی ذمہ داریوں کو پہچانیں اور بحیثیت ایک قوم شانے سے شانہ ملا کر کھڑے ہو جائیں۔ یہ تبھی ممکن ہے جب ہم امید کا دامن ہاتھ سے نہ چھوڑیں۔ اور اپنا خواب زندہ رکھیں۔ ایک مضبوط اور خوشحال پاکستان کا خواب ۔ مجھے مکمل اعتماد ہے کہ بحیثیت ایک قوم ہم میں یہ صلاحیت ہے۔ ہمارے عوام روکھی کھا کر گزارہ کر سکتے ہیں ۔ ہمارے ہنر مند نا ممکن کا ممکن بنا سکتے ہیں۔ ہما رے نوجوان ہر چیلنج کا مقابلہ کرنے کی صلاحیت رکھتے ہیں۔ لیکن یہ سب تبھی ممکن ہو گا جب مایوسی اور نا امیدی کو اپنے اوپر طاری نہ ہونے دیں۔ ہرپاکستانی قربانی کے جذبے سے سرشار ہو۔ اور یہ سمجھیں کہ قومیں مشکل حالات کی بھٹی سے ہی کُندن بن کر نکلتی ہیں۔ پاکستان کو ایک مضبوط اور خوشحال ملک بنانے کا خواب ممکن ہے اور ہم اس خواب کی تعبیر حاصل کرسکتے ہیں۔ لیکن اس کے لئے ضروری ہے کہ پاکستان پر ہمارا یقین مستحکم ہو۔ ہم سب کو اپنے مفادات سے بلند ہو کر ایک مضبوط اور خوشحال پاکستان کے لئے سوچنا ہو گا۔ ہم سب پر فرض ہے کہ وہ پاکستان جو ہمارے بزرگوں نے ہمارے لئے بنایا اسےِ مزید مضبوط اور خوشحال بنا کر اپنی اگلی نسلوں کا مستقبل محفوظ بنائیں۔ یہ ہماری موجودہ نسل کا فرض ہے۔ ہمیں قائداعظم کے یہ الفاظ ہمیشہ یاد رکھنے چاہیں۔

انہوں نے فرمایا

’’ہم نے پاکستان کی آزادی کی جنگ تو جیت لی ہے مگر آزادی کو برقراررکھنے اور اسے زیادہ مضبوط اور ٹھوس بنیادوں پر استوار کرنے کی جنگ ابھی جاری ہے۔ اگر ہمیں ایک عظیم تر قوم کی حیثیت سے زندہ رہنا ہے تو اس جنگ کو کامیابی سے ہمکنار کرنا ہوگا‘‘

خواتین و حضرات

۷۔      مسلمان موت سے نہیں ڈرتا۔ شہادت اﷲ تعالیٰ کی بڑی نعمت ہے جو قسمت والوں کو عطا ہوتی ہے۔ زندگی کا نذرانہ دے کر جاوداں زندگی کی نعمت اﷲ تعالیٰ کی طرف سے بڑا انعام اور بڑی عزت اور سعادت کی بات ہے ۔ شہیدوں کے خاندان کے افراد کے لئے اور پاکستانی مسلح افواج کے لئے ان ساتھیوں کی شہادت بڑی آزمائش کا مرحلہ ہے جواب ہم میں نہیں۔ اس کا رنج، اس کا ملال فطری ہے۔

۸۔      ہم اﷲ تعالیٰ سے شہیدوں کے درجات کی بلندی کے لئے دُعا کرتے ہیں اور ان کے اہل خانہ کے لئے صبرِ جمیل کی دُعا کر تے ہیں کہ انھوں نے اس عظیم قربانی کی اہمیت کو سمجھااور اس پر صبر کیا۔ ہم ان کے احسانات کو بھولے نہیں ہیں اور ہر قدم پر ان کے ساتھ ہیں۔

خواتین و حضرات

۹۔      پاکستان ایک امن پسند ملک ہے۔ ہماری سب سے بٹری خواہش ہے کہ تمام مُلکوں سے خوشگوار اور دوستانہ تعلقات قائم ہوں۔ ہم جانتے ہیں کہ ایک خوشحال پاکستان ہی مضبوط پاکستان کی ضمانت ہے۔ ہمارا ہر قدم عوام کی خوشحالی اور حفاظت کی طرف بڑھنا چاہیے۔ لیکن محض خوشحالی کے لئے ہم اپنے عزت و وقار کا سودا کبھی نہیں کریں گے۔ بلِ آخراہل پاکستان عزت و وقار سے جینے کا عزم کئے ہوئے ہیں۔ ہمارے قومی مفاد میں کیا اچھا یا بُرا ہے اس کا تعین کرنا صر ف اور صرف پاکستانیوں کا حق ہے۔ اور افواج ِ پاکستان اس عزم میں عوام کے ساتھ ہیں۔

۱۰۔      ہم One Force, One Family and One Nation پر یقین رکھتے ہیں۔ پاکستانی عوام، پاکستانی فوج، پاکستانی سپاہی، پاکستانی شہید، زندگی ہو یا شہادت ہر قدم پر ایک دوسرے کے ساتھ ہیں اور ساتھ رہیں گے۔

شکریہ

پاک آرمی زندہ باد

پاکستان پائندہ باد

--------------------------------------------------------------------------